Mánáidáittardeaddji lea mánáid ja nuoraid ovddasteaddji. Mii bargat mánáid vuoigatvuođaid ovdii.

Norgga mánáidáittardeaddji lei máilmmi vuosttaš mánáidáittardeaddji. Dál leat mánáidáittardeaddjit máŋgga riikkas máilmmis.

Mánáidáittardeaddji nammada Gonagas ja bargá mánáidáittardeaddjin guhtta jagi.

Mat leat min barggut:

• Mii galgat fuolahit ahte mánáid ja nuoraid oaivilat gullojit, ja ahte sin vuoigatvuođat doahttaluvvojit.
• Okta min deháleamos bargguin lea fuolahit ahte sii geat mearridit (eiseválddit) Norggas čuvvot mánáidkonvenšuvnna, mii lea oassin norgga lágain.
• Mánáidáittardeaddji lea sorjjasmeahttun. Dát mearkkaša ahte mii ieža mearridat makkár áššiiguin bargat, ja makkár oaivilat mis galget leat.

Mo mii bargat:

Mánáidáittardeaddji geahččala váikkuhit eiseválddiid hábmet buoret servodaga mánáide ja nuoraide.

Dan mii dahkat ná:

• lágidit logaldallamiid olbmuide geat barget mánáiguin dahje mánáid ovddas
• čállit reivviid eiseválddiide go mii oaivvildat ahte mánáid vuoigatvuođat eai leat doarvái bures áimmahuššon
• buktit cealkámušaid go lágat galget ráhkaduvvot dahje rievdaduvvot
• jearahallamiid bokte medias ja leat aktiivvalaš sosiála mediain
• deaivvadit ráđđehusa ja Stuorradikki politihkkáriiguin

Mii addit maiddái rávvagiid ja dieđuid mánáid vuoigatvuođaid birra olbmuide geat váldet oktavuođa minguin neahta, e-poastta dahje telefovnna bokte.

Okta dain deháleamos áššiin maid mii bargat, lea háleštit mánáiguin ja nuoraiguin iežaset vásáhusaid birra ja addit sin neavvagiid ja oaiviliid viidáseappot sidjiide geat mearridit.

Mánáidáittardeaddji bidjá juohke jagi erenoamáš fuomášumi ovtta dahje máŋgga suorgái gos mii oaidnit dárbbu nannet mánáid vuoigatvuođaid.

Maid mii sáhttit dahkat du ovddas?

Buohkat sáhttet váldit oktavuođa Mánáidáittardeaddjiin. Mii sáhttit vástidit gažaldagaide du vuoigatvuođaid birra ja addit dutnje rávvagiid. Sáhttet leat gažaldagat skuvlla, du bearraša, mánáidsuodjalusa, dearvvašvuođa, asylántamánáid vuoigatvuođaid ja eará fáttáid birra. Mii sáhttit maiddái addit dutnje dieđuid earáid birra geat sáhtášedje du veahkehit.

Mainna eat sáhte veahkehit du?

Mánáidáittardeaddji ii sáhte:

• rievdadit áššiid maid eará almmolaš eiseválddit leat mearridan, ovdamearkka dihtii mánáidsuodjalus, UDI, du skuvla dahje duopmostuollu.
• seaguhit iežas váhnemiid riidduide mánáid alde, dahje váhnemiid ja mánáid gaskasaš riidduide

Muhto buot dieđuid maid mii oažžut mánáid dili birra, sáhttit mii geavahit muitalit eiseválddiide ahte fertejit rievdadit áššiid. Sáhttet leat láhkarievdadusat dahje láhkageavaheami birra. Go mii dahkat dan, de lea danne go mii oaivvildat mánáid vuoigatvuođaid ferte buorebut áimmahuššat.

Ná válddát oktavuođa minguin

• sáhtát sáddet e-poastta deike: post@barneombudet.no
• sáhtát riŋget midjiide: 22 99 39 50
• sáhtát mannat min neahttasiidduide barneombudet.no
• sáhtát čuovvut min Facebookas, Twitteris ja Instagramas