Gå til toppen

Julevsámegiella (lulesamisk)

Mánájoahttse le mánáj ja nuoraj åvdåstiddje. Mij mánáj riektájt åvdedip.

Vuona mánájoahttse lij værálda vuostasj mánájoahttse. Dálla gávnnuji mánájoahttse moatten lándan væráldin.

Mánájoahttse Gånågisás nammaduvvá, ja mánájoahttsen doajmmá guhtta jage.

Anne Lindboe nammaduváj mánájoahttsen 2012:n ja galggá 2018 rádjáj doajmmat. Sån le mánájdåktår.

Ma li mijá dahkamusá:

  • Galggap gáhttit jut mánáj ja nuoraj vuojno gulluji, ja sijá riektá ålliduvvi.
  • Akta mijá ájnnasamos dahkamusájs le gáhttit sijájt gudi mierredi (oajválattjajt) Vuonan váj mánájkonvensjåvnåj tjuovvu, mij le oassen vuona lágas.
  • Mánájoahttse le luojvov. Dat mierkki iesj mierredip majna galggap barggat ja mav miejnnip.

Gåktu barggap:

Mánájoahttse gæhttjal aj oajválattjajt vájkkudit buorep sebrudagáv mánájda ja nuorajda hábbmit. Dáv návti dahkap:

  • Lågådallap ulmutjijda gudi barggi mánáj jali mánáj åvdås
  • Girjijt tjállep oajválattjajda gå miejnnip mánáj riektá ællá nuohkásit várajda váldeduvvam
  • Javllamusá gå lága galggi dagáduvvat jali rievddaduvvat
  • Ságájdahttema median ja dåjma sosiála mediajn
  • Tjåhkanime politihkkárij ráddidusán ja Stuorradikken

Vaddep aj rádijt ja diedojt mánáj riektáj birra ulmutjijda gudi mijájn aktijvuodav válldi nehta, e-påsta jali telefåvnå baktu.

Akta dajs ájnnasamos ássjijs majna barggap le sáhkadit mánáj ja nuoraj ietja sijá vásádusáj birra ja sijá oajvvadusájt ja vuojnojt vijddásappo sidjij gudi mierredi.

Juohkka jage vállji Mánájoahttse avtav jali moadda suorge majt vuorodip danen gå vuojnnep dárbbo le mánáj riektájt nannit.

Mav máhttep duv åvdås dahkat?

Juohkkahasj máhttá Mánájoahttsijn aktijvuodav válldet. Máhttep vásstedit gatjálvisájt duv riektáj birra ja duv væhkádallat. Da luluji gatjálvisá skåvlå, duv fámilja, mánájsuodjalusá, varresvuoda, asylmánáj riektáj jali ietjá fáttaj birra. Máhttep aj dunji subtsastit gudi iehtjáda soajtti máhttet duv viehkedit.

Majna ep máhte duv viehkedit?

Mánájoahttse ij máhte:

  • Rievddat ássjijt ma li ietjá almulasj oajválattjajs mierreduvvam dagu mánájsuodjalus, UDI, duv skåvllå jali duobbmoståvlå.
  • Sehkanit rijdojda æjgádij gaskan mánáj badjel, jali rijdojda æjgádij ja mánáj gaskan.

Valla gájka diedojt majt oadtjop gåktu máná dille le, máhttep adnet navti váj javllap oajválattjajda sij hæhttuji rievddat juojddáv. Dat máhttá liehket rievddama lágajn jali gåktu lága aneduvvi. Gå navti dahkap, de dav dahkap dan diehti gå miejnnip mánáj riektá hæhttuji buorebut várajda váldeduvvat.

Návti máhtá mijájn aktijvuodav válldet

  • Máhtá e-påstav diehki sáddit: post@barneombudet.no
  • Máhtá midjij riŋŋgut dán telefåvnnånummarin: 22 99 39 50
  • Máhtá mijá næhttabælláj mannat: www.barneombudet.no jali njuolgga mijás gatjádallat dán næhttabielen: www.spørbarneombudet.no
  • Máhtá mijájt facebookan, twitterin ja instagraman tjuovvot